Sad Ghazal Shayari – Meri Aankhon Ko Soojhta Hi Nahi

Meri aankhon ko soojhta hi nahi
Ya muqaddar mein rasta hi nahi

Woh bhare shehar mein kisi se bhi
Mere baare mein poochhta hi nahi

Phir wohi shaam hai wohi hum hain
Haan magar dil main hausla hi nahi

Hum chale uski bazm se uth kar
Aur woh hai ke rokta hi nahi

Dil jo ik dost tha magar woh bhi
Chup ka pathar hai bolta bhi nahi

Main to us ki talash main ghum hoon
Woh kabhi mujhko dhoondta hi nahi

Urdu Ghazal Shayari – Tumne Bhi Thukra Hi Diya

Tumne bhi thukra hi diya duniya se bhi door hue
Apne anaa ke saare shishe aakhir chakna-choor hue

Humne jin par ghazlein sochi unko chaha logon ne
Hum kitne badnam hue the, woh kitne mash-hoor hue

Tark-e-wafa ki saari kasmein unko dekh ke toot gayi
Unka naaz salamat thehra hum hi zara majboor hue

Ek ghadi ko ruk kar poochha usne to ahwaal magar
Baaki umar na mud kar dekha hum aise magroor hue

Ab ke unki bazm mein jaayega gar mohsin izn mile
Zakham hi unki nazar guzarein, ashq to na-manzoor hue

Urdu Ghazal Shayari – Main Bura Hi Sahi Bhala Na Sahi

Main bura hi sahi, bhala na sahi
Par teri kon si jafa na sahi

Dard-e-dil hum to unse keh ghuzre
Gar unhone nahin suna na sahi

Shab-e-gamm me bala se shugal to hai
Nala-e-dil mera rasa na sahi

Dil bhi apna nahin raha na rahe
Yeh bhi aye charkh-e-fitna-za na sahi

Dekh to lenge woh agar aaye
Taqat-e-arz-e-mudda na sahi

Kuchh to aashik se chhed-chhad rahi
Karz-adaayi sahi adaa na sahi

Kyon bura manate ho shikwa mera
Chalo beza sahi b-jaa na sahi

Uqada-e-dil hamara ya qismat
Na khula tujhse aye saba na sahi

Waaizon band-e-khuda to hai ‘aish’
Humne mana woh parasa na sahi

Romantic Ghazal Shayari – Didar Ki Hawas Hai

Didar ki hawas hai na shauk-e-visal hai
Aazad har khayal se mast-e-khayal hai

Keh do ye kohkan se hi marna nahin kamal
Mar mar ke hijra-e-yaar main jina kamal hai

Fatwa diya hai mufti abra-e-bahar ne
Tauba ka khoon bada-kashon ko halal hai

Aakhein bata rahin hain jaage ho raat ko
Inn saagron mein boo-e-sharab-e-wisal hai

Barsao teer mujhpe par itna jaan lo
Pehlu me dil hai, dil me tumhara khayal hai

Aakhein lada ke unse hum aafat mein pad gaye
Aakhon ki har zuban pe dil ka sawal hai

Bohat keh diya jo maine to ab bolte nahi
Itni si baat ka tumhein itna khayal hai

Poochha jo unse jante ho tum Jalil ko
Bole ke haan woh shayar-e-nazuk-khayal hai.

Hindi Ghazal Shayari – Koi Phool Dhoop Ki Pattiyon Mein

Koi phool dhoop ki pattiyon mein
Hare ribbon se bandha hua
Woh ghazal ka lehza naya-naya
Na kaha hua, na suna hua

Jise le gayi abhi hawa
Woh warak tha dil ki kitaab ka
Kahin aansuon se mita hua
Kahin aansuon se lika hua

Kai meel reth ko katkar
Koyi mauj phool khila gayi
Koyi ped pyas se mar raha
Nadi ke paas khada hua

Mujhe haadison ne saja-saja ke
Bahut haseen bana diya
Mera dil bhi jaise dulhan ka hath ho
Mehandiyon se racha hua

Wohi shehar hain wohi raaste
Wohi ghar hai aur wohi lawn hai
Magar is dareeche se poochhna
Woh darakht anaar ka kya hua

Wohi khat ke jispe jagah jagah
Do mehakte hothon ke chaand the
Kisi bhoole bisre se taak par
Tahe gard hoga daba hua.